Ei 65-na, CCIM Krizyhpa Thyutlia Py Ryureina Pakhypi, Lorrain Ville Local Church liata pahniehpa cha *'Krista hrialâhpa'* (II-Kor 6:1) Biepipa hmàpa ta, tàri 02.02.2023 tawhta pathaopa chàta, tari 05.02.2023 taihta hmàpa a chà. Abeipa ypàna nata chhihthana ry liata apalà kawpa ta Pakhypi programme pachhàpa a chà.
Pakhypi tlópaki-noh, 02.02.2023 zà taihta khichhai tlópa maluh, 'Registration Counter' liata alàpa zydua, maluh 350 chà eita, chutyh & pachyh-noh taihta khichhai tló-chhipa, Registration tao khao leipa maluhzy chhaota, maluh 400 rachhóh chà awpa hawhta pachàpa ama chà.
CCIM KTP Hqrs. Chhihthatuhpazy atlyh kó a chàpa hawhta, târi 04.02.2023(Pachyh-noh) ta Rev. Z. Hrohmó, ES i/c Fellowship chhihthana ry liata atlyhna hneipa cháta, ary liatahpa hawhta ;
*CCIM KTP Hqrs. Office Bearers (2023-2025)*
President : K/Machâ LM. Beingàlai
Elect President : Mc. M.Beirapha
Secretary : Ls.Vathiengia Nótlia, _(Assembly ta apiepa)_
Asst. Secretary : Machâ LC. Mathipi
Fin. Secretary : Puhpa.H. Beinónai
Treasurer : Laihsa. M. Sharoni
*Advisors :* _(Assembly ta a piepa)_
1. Pastor. M. Thachai
2. Machâ K. Zamo
Pakhypi Deligates eimà hnabeiseih kawpa thokha hmia vaw hmó thei hra vei sila, ary liatahpazy he ama hmia vaw hmó thei pita, eimà ly ngaita.
*ECM KTP Hqrs. OB tawhta :*
President : K/Mc. K. Vabeitha
Fin. Secy. : K/Mc. Lalneihkima
Treasurer : Ls. Anne Juliet Hlychho
*Town Executive Committee members :*
1. K/Mc. S. Vahro
2. Pp. Ng. Ngachhi
3. St. Mc. Beihrohmö
*ECM KTP Branch, College Vaih hlapy :*
Hlapy maluh : 53
Conductor : Puhpa S. Chabei
Asst.Cndtor : Puhpa NC. Augustine
*MEC Vyuh-tuapazy :*
1. Rev. San Lewin, Secretary
2. K/Mc Vabeisó, Vice Chairperson
*CCIM KNP HQ Vyuh-tuapazy:*
1. Pinô C. Nali, Treasurer
2. Pinô C. Nosia, Executive Member
Vyuh-tuapa (Deligate) zachhihpazy, eima ryureina maniah pahnokhei ta, maniah amà tyudua-làhpa hleikhó ta, khokheina-bie (Greetings) nata Angiahna châropa *'Memento'* sóh kawpa nata deichhyna sóh 'Cash' hluhpi chhao maniah ama hlà.
Cha hleikhó ta, Delegate hlapy College vaih ECM KTP Branch zyta Pakhypi programme chhóh zydua, hlapy nata mopakha 'Solo' zy hmàpa ta Khazohpa palyupalihna nata reithaina chalihsa beih leipa eita, cha chata Pakhypi nohàh avaw pa-ysa ngaita. Ama daihti, ama thàzàh nata hneina sóh hluhpizy hryuhpa ta, hehawhta maniah ama deichhyna zydua he arónah tah pita, eimà lynabie reih leithei mapi.
Achhà chaina ta, Pakhypi tló n'awpa su chàta eimà hawnazy maniah pyhpa eita, ama Olyu, hnopoh, ama daihti, niebaw nata hneina sóh hluhpi, eima pakhypi chàta amà vaw pasaihpa he aly ngaita pita, Lorrain Ville Local Church nah liata alynabie palóh tlokhuh eima reih hra. Abeipa ta alie hluhpi ta byhná pie hri se.
CCIM Assembly Nópawpazy, Pastor zy nata Missionary zy làta chhao alynabie eima reih hra. Eima pakhypi daihti chhóh zydua, maniah tyudua-làhpa ta, ama pasopakàna zy vàta ryureina kyh nata programme hropa zydua lia chhao, thlalóh kawpa ta siekhei theipa eima chà. Ama tiama-kheina zydua liata alynabie eima reih hmeiseih hra.
SECRETARY, CCIM KTP HQRS
